काँकडभिट्टाबाट काठमाडौं आइरहेको बस दासढुंगामा दुर्घटना, १९ घाइते
प्रकाशित मिति: शुक्रबार, आषाढ २९, २०८० | ९:१७:३१
चितवन । झापाको काँकडभिट्टाबाट काठमाडौंतर्फ गइरहेको बागमती प्रदेश ०१–००६ ख ५२३७ नम्बरको यात्रु बस नारायणगढ–मुग्लिन सडकखण्ड अन्तर्गत चितवनको भरतपुर महानगरपालिका वडा नं. २९ दासढुंगामा दुर्घटना भएको छ ।
दुर्घटननामा १९ जना घाइते भएका जिल्ला प्रहरी कार्यालय चितवनले जानकारी दिएको छ । बस बिहान ५ः२० बजे आफैं अनियन्त्रित भएर पल्टिँएको जिल्ला प्रहरी कार्यालय चितवनका प्रवक्ता डिएसपी विजयराज पण्डितले जानकारी दिए।
दुर्घटनाका घाइतेहरुलाई उपचारका लागि भरतपुरका विभिन्न अस्पतालमा ल्याइएको छ । बस चालक पनि घाइते भएर उपचाररत छन् । घाइतेहरुमध्ये केहीको अवस्था मध्यम र केहीको सामान्य रहेको पण्डितले बताए ।
बस सडकबाट झण्डै १० मिटर तल खसेर रुखमा अड्किएको छ। बसलाई दुर्घटनास्थलबाट बाहिर निकाल्ने प्रयास भैरहेको प्रहरीले जनाएको छ ।
बसमा सवार चालक सहित ४० जनामध्ये १९ जना घाइते भएका हुन् ।
डिएसपी पण्डितले सबै घाइतेको अवस्था सामान्य रहेको जानकारी दिए।
प्रकाशित मिति : शुक्रबार, आषाढ २९, २०८० |
९:१७:३१
3323
