सुर्खेतका एकै परिवारका ५ जनाको भारतमा ट्रकको ठक्करबाट मृत्यु

सुर्खेत । भारतमा दुर्घटनामा सुर्खेतका एकै परिवारका पाँच जनाको मृत्यु भएको छ। रोजगारीको सिलसिलामा भारतको कर्नाटकको गुलवर्गा जिल्लाको अवजलपुरको तलकामामा सवारी दुर्घटनामा परी उनीहरूको मृत्यु भएको हो। मृत्यु हुनेमा पश्चिम सुर्खेतको चौकुने गाउँपालिका–७, अमलाटाकुराका अन्दाजी २७ वर्षीय रतन नेवार, उनकी श्रीमती २५ वर्षीय अस्मिता नेवार, उनका छोरा ५ वर्षीय मिलन नेवार, अर्का छोरा २ वर्षीय धड्कन नेवार र भाइ बुहारी सुस्मिता नेवार छन्।

गोवा जाने मुख्य सडकमा ट्रकको ठक्करबाट गएराति उनीहरूको घटनास्थलमै मृत्यु भएको परिवारजनले जानकारी दिएका छन् । चौकुने गाउँपालिकाका–७ का वडाध्यक्ष धनीराम धमलाले मृतक रतनका दाइ त्यहाँकै एक अस्पतालमा उपचाररत रहेकाले उनीहरू स–परिवार बिरामीलाई अस्पतालमा भेट्न गएका र भेटेर फर्किने बेलामा ट्रकले ठक्कर दिएको जानकारी दिए ।

वडाध्यक्ष धमलाले रतनले चलाएको मोटरसाइकलाई विपरीत दिशाबाट आएको ट्रकले ठक्कर दिएको जानकारी आएको बताए । रतनको परिवार सबै एउटै मोटरसाइकलमा सवार थिए। मृतक नेवार परिवार विगत एक वर्षदेखि रोजगारीको सिलसिलामा भारतमा बस्दै आएका थिए । धमलाले सुस्मिताको एक महिना अगाडि मात्रै बिहे भएको र सुस्मिताका श्रीमान् पनि भारतमै रहेको जानकारी दिए ।