कैलालीमा मिनी ट्रक दुर्घटना हुँदा एकको मृत्यु, १७ जना घाइते

धनगढी । कैलालीमा मिनी ट्रक दुर्घटना हुँदा एक जनाको मृत्यु भएको छ, भने १७ जना घाइते भएका छन । सोमबार साँझ भीमदत्त राजमार्गअन्तरगत गोदावरी नगरपालिका-४ मा से१ख १४३८ नम्बरको मिनी ट्रक दुर्घटना हुँदा एक जनाको घटनास्थलमै मृत्यु भएको र १७ जना घाईते भएको प्रहरीले जनाएको छ । सुदूरपश्चिम प्रदेश ट्राफिक प्रहरी कार्यालय अत्तरियाकाअनुसार मृत्यु हुनेमा डोटीको जोरायल गाउँपालिका-२ की ५८ वर्षीया शोभा बिक रहेकि छन् । बिकको घटनास्थलमै मृत्यु भएको हो ।

घाइते सबै डोटीको जोरायल गाउँपालिका क्षेत्रका रहेको र उनीहरुमध्ये दुई जनाको अवस्था गम्भीर रहेको प्रहरीले जनाएको छ । घाइतेहरुको धनगढीको सेती प्रादेशिक अस्पताल, माया मेट्रो अस्पताल र अत्तरियाको पद्यमा अस्पतालमा उपचार भइरहेको छ । तिहार मनाएर पहाडी जिल्लाबाट तराई फर्किनेहरुको भीडभाडका कारण सार्वजनिक गाडीमा सिट नपाएर उनीहरु मिनी ट्रकमा आएको हुनसक्ने प्रहरीले जनाएको छ । दुर्घटनापछि मिनी ट्रक चालक फरार भएका छन ।