उर्लाबारी आगलागी : मृत्यु हुनेकाे संख्या ३ पुग्यो
प्रकाशित मिति: बिहिबार, मंसिर ०७, २०८० | १५:२४:०९
काठमाडौं । लक्ष्मी पूजाको राति मोरङको उर्लाबारी नगरपालिका–७ बरगाछीमा भएको आगलागी घटनामा घाइते भएका अर्का एक घाइतेको पनि मृत्यु भएको छ । यो सँगै उक्त आगलागी घटनामा परेर मृत्यु हुनेको संख्या तीन पुगेको छ । प्रहरीका अनुसार मंगलबार विहान एक जनाको मृत्यु भएको थियो । बुधबार राति र बिहीबार बिहान थप दुई जनाको मृत्यु भएको हो ।
बुधबार राति साढे १० बजेतिर उर्लाबारी–७ का ४९ वर्षीय हेमकुमार दाहाल (दीपक) र बिहीबार बिहान साढे ६ बजेतिर उर्लाबारी–७ कै ४२ वर्षीय कुमार तामाङको उपचारका क्रममा मृत्यु भएको हो । मंगलबार स्थानीय ४३ वर्षीय तपन पण्डितको उपचारका क्रममा मृत्यु भएको थियो । २६ कात्तिकमा स्नेहा सुनचाँदी पसलमा भएको आगलागी नियन्त्रणका क्रममा सिलिण्डर विष्फोट हुँदा चार प्रहरीसहित २८ जना घाइते भएका थिए ।
प्रकाशित मिति : बिहिबार, मंसिर ०७, २०८० |
१५:२४:०९
3169
