विराटनगरमा ट्रकको ठक्करबाट साइकलयात्री वृद्धको मृत्युपछि तनावग्रस्त
चितवन, १८ असोज । ट्रकको ठक्करबाट साइकलयात्री वृद्धको मृत्युपछि विराटनगरको रानीस्थित आईसीपी रोड तनावग्रस्त बनेको छ । दुर्घटनापछि आक्रोशित स्थानीयले ढुङ्गामुढासहित प्रदर्शन गरेका छन् । प्रहरीले भिड नियन्त्रणमा लिन केही थान अश्रुग्यास समेत प्रहार गरेको छ । अहिले यहाँ प्रहरीको बाक्लो उपस्थिति छ । बिहीबार बेलुका झण्डै ७ बजे ना. ४ ख २४८३ नम्बरको ट्रकले साइकलयात्री विराटनगर-१८ का अन्दाजी ६० वर्षीय श्याम साहलाई ठक्कर दिएको थियो । उपचारका लागि विराट नर्सिङहोम पुर्याएलगत्तै साहको मृत्यु भएको थियो ।
ट्रकका चालक फरार भएपछि स्थानीय आन्दोलित छन् । सडक साँघुरो हुँदा दुर्घटना बढेको भन्दै करिब ५ सयको संख्यामा भेला भएका स्थानीयले सडकको स्तरोन्नति हुनुपर्ने, मालवाहक सवारीसाधनको गति सीमित गर्नुपर्ने, रात्रिकालीन बत्तीको व्यवस्था हुनुपर्ने लगायतका माग राखेका छन् ।
