सगरमाथाको कथामा आधारित फिल्म ‘जेरी अन टप’ आजदेखि प्रदर्शनमा

चितवन , ३१ असोज । विश्वकै सर्वोच्च शिखर सगरमाथा नेपालमा अवस्थित छ। यसकै कथालाई लिएर हलिउडमा विभिन्न चलचित्र र वृत्तचित्र निर्माण भइसकेका छन्। तर, सगरमाथासँग प्रत्यक्षरूपमा जोडिएको कथा समेटेर तयार गरिएको नेपाली चलचित्र भने अब मात्र दर्शकमाझ आएको छ। सगरमाथा आरोहण र त्यसक्रममा फलेको प्रेमकथामा आधारित नेपाली चलचित्र ‘जेरी अन टप’ आजदेखि प्रदर्शनमा आएको हो।

चलचित्रले सगरमाथालाई मुख्य विषय बनाएको छ। यसले नेपालको पर्यटन प्रवर्द्धन र प्राकृतिक सौन्दर्यलाई विश्वमाझ परिचित गराउन योगदान दिने विश्वास अभिनेता अनमोल केसीले व्यक्त गरे।

चलचित्र प्रदर्शनको पहिलो दिन दर्शकको प्रतिक्रिया बुझ्न चलचित्र भवन पुगेका अभिनेता केसीले सगरमाथाको विषयलाई प्रस्तुत गर्नु नै निर्माणको मुख्य चुनौती भएको बताए। उनले भने, “हामीले कथा तयार गर्दा नेपाली स्रोत र साधनले सगरमाथालाई कसरी चित्रण गर्न सकिन्छ भन्नेमा धेरै छलफल गरेका थियौं। प्राविधिक रूपमा त्यहाँ छायाङ्कन चुनौतीपूर्ण छ, त्यसैले हामीले नेपाली बजारलाई ध्यानमा राखेर लगानी गर्नुपरेको हो। तर सबैको मेहनतले अन्ततः चलचित्र तयार गर्न सफल भयौं।”

चलचित्रमा केसीले सगरमाथा चढ्ने युवाको भूमिका निभाएका छन्। स्वाभाविक अभिनयका लागि उनले र ‘गाइड’को भूमिकामा देखिएकी जसिता गुरुङले एक महिना प्रशिक्षण पनि लिएका थिए। “हामीले दृश्यहरूमा सगरमाथाको वास्तविकता झल्कियोस् भनेर शेर्पा भाइहरूको निगरानीमा काम गरेका हौं,” केसीले बताए।

उनका अनुसार चलचित्रले एउटा पारिवारिक प्रेमकथासँगै नेपालको हिमाली सुन्दरतालाई नयाँ ढंगले प्रस्तुत गरेको छ। यसले भविष्यमा हिमाली पृष्ठभूमिमा चलचित्र बनाउन अन्य निर्मातालाई पनि प्रेरणा दिने विश्वास उनले व्यक्त गरे।

अभिनेत्री जसिता गुरुङले पनि आफ्नो भूमिकालाई स्वाभाविक बनाउन धेरै तयारी गरेको बताइन्। “हिमालसँग नजिक भएकी युवतीको भूमिका भएकाले त्यसअनुरूप मेहनत गरेकी हुँ। चलचित्रले नेपालको हिमाली सौन्दर्यलाई पूर्ण रूपमा उजागर गरेको छ,” उनले भनिन्।

त्यस्तै, अभिनेत्री आँचल शर्माले झन्डै ११ वर्षअघि प्रदर्शन भएको **‘जेरी’**ले युवापुस्तामाझ आकर्षण सिर्जना गरेको स्मरण गर्दै सोही नामसँग मिल्दोजुल्दो चलचित्र **‘जेरी अन टप’**ले पनि नयाँ पुस्तालाई चलचित्र भवनसम्म ल्याउने विश्वास व्यक्त गरिन्। “त्यो बेला म चलचित्र क्षेत्रमा थिइनँ, तर ‘जेरी’ले युवामा हल हेर्ने उत्साह जगाएको थियो। अहिले सोही नाम र सोही अभिनेतासँग काम गर्न पाउँदा खुसी लागेको छ,” उनले भनिन्।

चलचित्रका प्रस्तुतकर्ता सरोज न्यौपानेका अनुसार, चलचित्रले युवापुस्ताको कथा मार्फत नेपालको प्राकृतिक सौन्दर्यलाई प्रस्तुत गरेको छ। “मुख्य पात्रले सगरमाथा आरोहणका क्रममा भोग्ने घटनाक्रममार्फत चलचित्रले पर्यटन प्रवर्द्धनमा टेवा पुर्‍याउने अपेक्षा राखेका छौं,” उनले भने।

**‘अनन्या फिल्म्स प्रोडक्सन’**बाट निर्मित यो चलचित्रको निर्देशन सुयोग गुरुङले गरेका हुन्। चलचित्रमा अनमोल केसी, भुवन केसी, आँचल शर्मा, जसिता गुरुङ, केदार घिमिरे ‘माग्ने बुढा’, र उषा खड्गीलगायत कलाकारले अभिनय गरेका छन्। कथा हेमराज विसी, पटकथा विश्वास तिम्सिना, र छायाङ्कन दुलिप रेग्मीले गरेका हुन्।