गोवामा नाइटक्लबमा आगलागी, चार नेपालीसहित २५ जनाको मृत्यु
प्रकाशित मिति: सोमबार, मंसिर २२, २०८२ | १८:२५:५३
चितवन, २२ मंसिर । भारतको गोवा स्थित एक पर्यटकीय नाइटक्लबमा आगलागी हुँदा चार नेपाली नागरिकसहित २५ जनाको मृत्यु भएको अधिकारीहरूले सोमबार जानकारी दिएका छन्।
आइतबार भएको यस घटनामा शोक व्यक्त गर्दै नेपालका राजदूत शङ्कर शर्माले विज्ञप्ति जारी गरेका छन्। उहाँले शोकाकुल परिवारप्रति समवेदना प्रकट गर्दै घाइतेहरूको शीघ्र स्वास्थ्य लाभको कामना गर्नु भएको छ।
मृतकहरूमा अधिकांश भारतीय नागरिक रहेका छन्, जसमा नाइट क्लबका कर्मचारीहरू र नयाँ दिल्लीबाट छुट्टी मनाउन आएका पर्यटकहरू पनि समावेश छन्।
अधिकारीहरूले जानकारी दिएका अनुसार, गोवाको उत्तरमा स्थित अर्पोरा क्लबमा आगलागी भएको हो। आगो विद्युतीय पटाखाबाट सञ्झ्यालको काठका भागबाट शुरु भएको हुनसक्ने अनुमान गरिएको छ। आगो फैलिँदा अधिकांशको मृत्यु भएको बताइएको छ।
गोवाका मुख्यमन्त्री प्रमोद सावन्तले घटनाको छानबिन गर्न चार जनालाई पक्राउ गरिएको र अन्य नाइट क्लबहरूको पनि जाँच गर्न आदेश दिएका छन्।
प्रकाशित मिति : सोमबार, मंसिर २२, २०८२ |
१८:२५:५३
1893
