रसुवागढी नाकाबाट सुनसहित ३ जना पक्राउ

काठमाडौं । रसुवागढी नाकाबाट १३ लाखभन्दा बढी मूल्य बराबरका सुनका औंठीसहित तीन जनालाईं प्रहरीले पक्राउ गरेको छ । सुन तस्करी हुन थालेपछि प्रहरीले विशेष निगरानी बढाएसँगै ३ जनालाई पक्राउ गरेको हो । पक्राउ पर्नेहरुमा रसुवाको आमाछोदिङमो गाउँपालिका वडा नम्बर ५ गोङ्गाङ बस्ने २९ वर्षीय सुरेश तामाङ, सोही गाउँपालिकाको वडा नम्बर ५ तातोपानी बस्ने ३७ वर्षीय निमा टासी तामाङ र गोसाईकुण्ड गाउँपालिका-३ ब्रिदीम बस्ने २३ वर्षीय ङ्वाङ लोप्साङ तामाङ रहेका छन् ।

इलाका प्रहरी कार्यालय टिमुरेबाट खटिएको सशस्त्र प्रहरीको टोली र रसुवा भन्सार कार्यालयको संयुक्त टोलीले सोमबार साँझ उनीहरुलाई चीनबाट नेपाल आइरहेका बेला पक्राउ गरेको थियो । उनीहरुको साथबाट एकरएक थान बेरुवा औंठी बरामद भएको छ । ती औंठीको तौल १२ तोला रहेको र १३ लाख ८८ हजार ४०० रुपैयाँ मूल्य बराबरको रहेको प्रहरीको भनाइ छ ।