चितवन, २८ मंसिर । सिड्नीको प्रसिद्ध बोन्डी समुद्र तटमा आइतबार भएको गोलीकाण्डमा कम्तीमा १० जनाको मृत्यु भएको र १६ जना घाइते भएको स्थानीय सञ्चारमाध्यमहरूले जानकारी दिएका छन्।

सिड्नी पुलिसका अनुसार एक अज्ञात समूहको आक्रमणमा ‘केही व्यक्तिहरू’ को मृत्यु भएको र घटनामा संलग्नताको आशङ्कामा दुई जनालाई हिरासतमा लिइएको छ।

घटनाको समय, यहूदी समुदायका सदस्यहरू समुद्र तटमा छुट्टी मनाउन भेला भएका थिए, जहाँ हनुक्का पर्वका अवसरमा दीप प्रज्वलन गरी आठ दिन लामो यो पर्व मनाइँदै थियो।

अष्ट्रेलियन ब्रोडकास्टिङ कर्पोरेसनका अनुसार, कम्तीमा १६ जनालाई अस्पताल पुर्याइएको छ, र धेरैलाई घटनास्थलमै उपचार दिइएको छ।

अस्ट्रेलियाली यहुदी सङ्घका प्रमुख रोबर्ट ग्रेगरीले भने, “यो गोलीकाण्ड एक ‘त्रासदीपूर्ण तर पूर्ण रूपमा पूर्वानुमानित’ घटना हो।” उनले सरकारलाई यसबारे बारम्बार चेतावनी दिइएको भए पनि यहूदी समुदायको सुरक्षा सुनिश्चित गर्न पर्याप्त कदम चाल्न असफल भएको आरोप पनि लगाएका छन्।

फ्रान्सको एएफपी समाचार एजेन्सीले ग्रेगरीलाई उद्धृत गर्दै लेखेको छ, “अल्बानिज सरकारलाई धेरै पटक चेतावनी दिइयो, तर यसले यहूदी समुदायको रक्षाका लागि आवश्यक कदमहरू चाल्न असफल भएको छ।”