शिक्षामन्त्री पोखरेल र मंगोलियाका पूर्वप्रधानमन्त्रीबीच भेट, विद्यालय तहमा चेस प्रवर्द्धनमा सहकार्य गर्ने सहमति
चितवन, १८ साउन । शिक्षा तथा खेलकुदमन्त्री सस्मित पोखरेलसँग मंगोलियाका पूर्वप्रधानमन्त्री तथा मंगोलियन चेस फेडेरेशनका अध्यक्ष गोम्बोजाभिन जान्दानशातारले सोमबार शिष्टाचार भेटवार्ता गरेका छन्।
सिंहदरबारस्थित शिक्षा तथा खेलकुद मन्त्रालयमा भएको भेटमा नेपाल–मंगोलियाबीचको द्विपक्षीय सम्बन्ध, शिक्षा तथा खेलकुद क्षेत्रको सहकार्य र विद्यालय तहमा चेस खेलको प्रवर्द्धनका विषयमा छलफल भएको थियो।
मन्त्री पोखरेलले नेपाल र मंगोलियाबीचको लामो मैत्रीपूर्ण सम्बन्ध, समान भौगोलिक अवस्था र सांस्कृतिक निकटताको उल्लेख गर्दै शिक्षा तथा खेलकुद, विशेषगरी चेस खेलको विकासका लागि मंगोलियासँग सहकार्य गर्न नेपाल इच्छुक रहेको बताए। उनले नेपाल चेस महासंघ र मंगोलियन चेस फेडेरेशनबीच सहकार्यको वातावरण बनाउन मन्त्रालयले आवश्यक पहल गर्ने प्रतिबद्धता पनि व्यक्त गरे।
पूर्वप्रधानमन्त्री जान्दानशातारले चेस केवल खेल नभई शिक्षाको प्रभावकारी माध्यम भएको उल्लेख गर्दै मंगोलियाले विद्यालय शिक्षामै चेसलाई समावेश गर्ने अनुभव नेपालसँग साझेदारी गर्न तथा यस क्षेत्रमा सहकार्य गर्न पूर्ण रूपमा तयार रहेको बताए।
उनले चेसले विद्यार्थीमा समालोचनात्मक सोच, विश्लेषणात्मक क्षमता, निर्णय गर्ने सीप, समस्या समाधान गर्ने दक्षता तथा बौद्धिक विकास अभिवृद्धि गर्न महत्त्वपूर्ण भूमिका खेल्ने धारणा व्यक्त गरे।
